પ્રદીપકુમારની કલમે…

                          સમજણ શબ્દની

તાઃ૬/૧૦/૨૦૧૦                            પ્રદીપ બ્રહ્મભટ્ટ

ક.…………

કરી લીધેલા કામ જગતમાં,ના રાખવો તેમાં કોઇ ક્ષોભ
મળી જાય જ્યાં માણસાઇનો સંગ,ઉજ્વળ જીવન ચારે કોર.

ખ………..

ખરી ભક્તિ થાય છે ઘરમાં,ના મંદીર તમારે જાવું દુર
સમયને પકડી ચાલી લેતાં જ,જીવને મળે છે ભક્તિના સુર.

ગ…………

ગર્જતા મેધ ના વરસે તેટલા,જેટલા વાદળ છે અથડાય
શાંન્ત પાણી શીતળ લાગે,પડો ત્યારે જ ઉંડાઇ જાય સમજાઇ.

ઘ………..

ઘરનુ ઘરમાં ને બહારનુ બહાર,જ્યાં સમજ આ આવી જાય
સફળ  સંસાર આ થઇ જ જાય,ને જીવન ઉજ્વળ પાવન થાય.

ઙ????????

ચ……….

ચતુરાઇના એક ચણથી,જીવનમાં સાચે માર્ગ મળે
શોધતા આખી જીંદગી ભાઇને,ના સાચી કોઇ પાળ મળે.

છ……….

છળ કપટથી દુર રહેતાં,જગે પ્રેમ પારકાનો મેળવાય
ઉજ્વળ જીવને કેડી મેળવતાં,જન્મ સાર્થક જીવનો જીવાય.

જ………..

જન્મ મરણ છે જીવના બંધન,છે અણસાર પરમાત્માનો
સાચી પ્રીત જ્યાં થાય પ્રભુથી,મળે મુક્તિ જીવને જન્મમરણથી.

ઝ……….

ઝંઝટ જગમાં દેહને વળગે,જે  દેખાય છે અઢળક મોટી
આવે આંગને વ્યાધીઓ દોડી,એતો જીવને દઇ જાય છે સોટી

ઞ.????????

ટ……….

ટળી જાય આ મોહ માયા જગતના,ને દુર ભાગે છે દ્વેષ
મળે પ્રેમ સાહિત્ય સરીતાનો હ્યુસ્ટનમાં, ના પહેરવો બીજો વેશ.

ઠ………

ઠળીયો એક મળે જગતમાં,જે જમીનમાં જ દટાય
ઉગી નીકળે અવનીએ,ત્યાં અજબ તેનો સ્વાદ મેળવાય

ડ………

ડગલુ ભરવું સમજીને,તો ના ક્યાંય કદીય ફસાય
સાચવવાની ટેવ પડે જ્યાં,ત્યાં પરમાત્મા રાજી થાય

ઢ………

ઢગલો જોઇ નાંણાનો,ના કદી મોહ મનથી રખાય
રાખતા મોહ જીવનમાં,જીવન ઢગલાંમાં દટાઇ જ જાય

ણ……..

ણનો સંબંધ ફેણથી છે,જે રાહ સમયની જુએ
મળી જાય એક જ તક,ત્યાં જીવનમાં ઝેર ભેળવે

ત………

તમારું તમારું જીભથી બોલાય,જ્યાં ખાડાને ખોદાય
પડીને કોઇ બહાર નીકળે,ત્યાં મેં મદદ કરી  બોલાય

થ………

થવાનું જગમાં ના જાણે કોઇ,છતાં ભોળા જ ભોળવાય
નાણાંના ચમત્કારને જોતાં,અતિના અણસારમાં લબદાય

દ………

દાન કરવું ના માન લેવા,એ તો અભિમાન જ કહેવાય
સાચું દાન પ્રેમનું જગતમાં,જેનાથી માનવતા મેળવાય

ધ……..

ધજા ધર્મની કળીયુગમાં,ના જીવનો ઉધ્ધાર કરી જાય
લહેર કરે ને માણે મઝા,અંતે કળીયુગમાં જ એ ભટકાય

ન……..

નથી રહ્યુ અભિમાન રાજા રાવણનું,ઉંમરો જ્યાં ઓળંગાય
પરમાત્માની સોટી એક પડતાં,નાશ થાય છે આ અવતાર

પ……..

પાદુકાની પરખ થતાં જ,શીશ આ ઝુકી જાય
એક અણસાર મળતાં,જીવન આ બદલાઇ જાય

ફ………

ફરક એટલો પ્રેમમાં,એક દેખાવે દોરી જાય
બીજો મળે વણ માગ્યો,જે દીલમાં પ્રસરી જાય

બ………

બને આ જીવન સાર્થક,જ્યાં દેહને સાચી રીતે સમજાય
પગલે પગલુ સાચવી લેતાં,મોહમાયા દુર ભાગી  જાય

ભ………

ભાગ્ય લખેલા મિથ્યા થાય,જ્યાં જલાસાંઇ ને ભજાય
દુઃખના ડુંગર નજીક ના આવે,એતો પાતાળમાં પહોંચી જાય

મ………

મળેલ માનવ જન્મ જીવને,જ્યાં જીવથી મુક્તિને મેળવાય
ડગલે ડગલુ સમજી ચાલતાં,જીવ પર પ્રભુકૃપા થઇ જાય

ય………

યાદ કરી ભુતકાળને  જગતમાં,જીવન ના વેડફાય
આવતી કાલની ચિંતા રહેતા,ઉજ્વળ ભવ થઇ જાય

ર……….

રામ નામની લગની સાચી,દેહ ભક્તિ એ મલકાય
કૃપા મળતા જીવને જીવનમાં,સઘળુ મળી જાય

લ………

લખેલા લેખ દેહના અવનીએ,કદી મિથ્યા કોઇથીય કરાય
સરળતાનો સંગ મળે જીવનમાં,જ્યાં ભક્તિ સાચી થાય

વ………

વંદન કરવા માતપિતાને,ને ગુરૂજીનુ કરવુ સન્માન
મળી જાય આશિર્વાદ બંન્નેના,સાર્થક જન્મ બને સાકાર

શ………

શું  ની વ્યાધિ સૌને જગમાં,ના કોઇથીય તરછોડાય
રાજા રંક કે હોય ભિખારી,સૌ એમાં જ છે લબદાય

ષ………

ષનો સંબંધ સંતોષથી,જે આંખ બંધ કરી અનુભવાય
મળી જાય મહેંક પ્રભુની જ્યારે,ત્યારે એ તો સમજાય

સ………

સરસ મઝાની સોટી દેખાય,પણ પડે જ્યાં બરડે આજે
ત્યારેજ યાદ આવે માતાનુધાવણ,ના બીજી સોટી કોઇ માગે.

હ……….

હતો એકલો જવાનો એકલો,શાને વ્યાધી વળગી આજ
વમળમાં આ જીવ બંધાણો,સુધરશે ક્યાંથી આવતી કાલ

ળ………

ળ ને સંબંધ પળપળથી,જ્યાં એ સચવાઇ  જાય
ના વ્યાધીની પળ આવે,એતી દુરથી જ ભાગી જાય

ક્ષ………

ક્ષતી એક જો મળે જીવનમાં,તો ચેતીને તમે ચાલજો
ભવસાગરથી ઉગરી જાશો,ને જન્મ ઉજ્વળ પણ કરશો.

જ્ઞ………

જ્ઞાનની જ્યોત મળે ભક્તિથી,જે સદમાર્ગે જ દોરી જાય
ધીમે ધીમે પકડી લેતાં જીવનમાં,જન્મ સફળ કરી જાય

===============================

                               અકળામણ

તાઃ૫/૧૦/૨૦૧૦                        પ્રદીપ બ્રહ્મભટ્ટ

અતિની આવે જ્યાં આંધી,ત્યાં મળી જાય સૌ વ્યાધી
એકની મળે જ્યાં સીડી,ત્યાં આવે અકળામણની દોડી
                              ………અતિની આવે જ્યાં આંધી.
સરગમનાસુર જેવી જીંદગી,સુખદુઃખને એ માણી લેતી
કદીક ઉજાસ આવે છે સંગે,ને પછી મળે થોડો અંધકાર
કળીયુગ ને સતયુગની આ કેડી,સમય સમયે બદલાય
જીવની જ્યોત ભક્તિનાસંગે,ટળી જાય વ્યાધી પળવાર
                             …………અતિની આવે જ્યાં આંધી.
ટેક એક ને જ્યાં શ્રધ્ધા એક,ત્યાં પરમાત્માનો છે હેત
મળે પ્રેમ જ્યાં જલાસાંઇનો,મોહ રહે ના કોઇ આગવો
મનની મુંઝવણ એ અકળામણ,જે રામ નામથી ભાગે
કઠણ કેડી જગત જીવોની,જે ભક્તિ ભાવથી દુર નાસે
                             ……….અતિની આવે જ્યાં આંધી.

===============================

                          સમયના વ્હેણ

તાઃ૪/૧૦/૨૦૧૦                       પ્રદીપ બ્રહ્મભટ્ટ

સમયના ચાલતા વ્હેણને ના કોઇથી રોકાય
             સમજ ના આવતા માનવીથી ક્યારેક એ ટોકાય
અજબ કુદરતની અજબ લીલા અવનીએ કહેવાય
           જન્મ મળેલ જીવના દેહને અહીંતહીં એ લઈ જાય
                               ………….સમયના ચાલતા વ્હેણને.
પકડી કેડી ચાલતા માનવીને મહેનતથી સમજાય
        મળી જાય અણસાર પ્રભુનો ત્યાં જીવન છે મલકાય
આજકાલના આ વ્યવહારમાં દેહ જલ્દી છે ફસાય
        મળીજાય સહવાસ સંગીનીનો જીવન ત્યાં સમજાય
                                 ………..સમયના ચાલતા વ્હેણને.
નિર્ધન ને ધનવાનના વમળમાં દેહ આ જકડાય
           માનવતા મુકાઇ જતાં માનવ જીવન આ વેડફાય
સુખદુઃખનો સંગાથ મળતા દેખાય સમયના વ્હેણ
            સમયપારખી ચાલતાં સંગે મળે સરળતા ને સ્નેહ
                                 ………..સમયના ચાલતા વ્હેણને.

+*+*+*+*+*+*+*+*+*+*+*+*+*+*+*+*+*+*+

                         સમયની સાચવણી

તાઃ૩/૧૦/૨૦૧૦                           પ્રદીપ બ્રહ્મભટ્ટ

હિંમત દઇદે રાહ જીવનને,નિર્મળ જીવન પણ મળી જાય
આવીઆંગણે મળે સફળતા,જ્યાંસમયની સાચવણી થાય
                               ………..હિંમત દઇ દે રાહ જીવનને.
મોહ માયાના અતુટ બંધન,જન્મ મળતા દેહથીએ બંધાય
સફળતાની સીડી દુરરહેતા,વ્યાધીઓથી કદીય ના છુટાય
એક તોડતાં બીજી છે બાજુમાં,જે કદી કોઇથીય ના તોડાય
મળે અણસાર જીવનમાં તેનો,જે સમયને પકડતાં બચાય
                             ………… હિંમત દઇ દે રાહ જીવનને.
સમય કદીના પકડાય કોઇથી,પણ સમજી સાથેછે ચલાય
દેહનેસંબંધ ઉંમરથી સાચો,જે સમયે દેહને જોતાં વરતાય
મળે સહવાસ,સાથ ને સ્નેહજગે,જ્યાં માનવતાએ જીવાય
સમયની સાચી સમજણ મનથી,જે સદબુધ્ધિએ મેળવાય
                              …………હિંમત દઇ દે રાહ જીવનને.

++++=====+++++=====+++++=====+++++

નવરાત્રીના ગરબાનો આનંદ માણવા નીચેની વેબ સાઇટ પર
જશો તો ગરબાનો આનંદ અને પવિત્ર તહેવારની ગુજરાતી યાદ
જરૂર આવશે.
              www.rangilogujarat.com

ગુજરાતી ગરબા માણો.  પ્રદીપ બ્રહ્મભટ્ટ.  ૨/૧૦/૨૦૧૦.

                         હાથની પકડ

તાઃ૨/૧૦/૨૦૧૦                    પ્રદીપ બ્રહ્મભટ્ટ

મનમાં અડગ છે શ્રધ્ધા,ને મળે પ્રભુની કૃપા
જકડે હાથ જ્યાં કાયા,દેહ બની જાય કદરૂપા
                      ………મનમાં અડગ છે શ્રધ્ધા.
આંગળી એક દઇદે ટેકો,ને હાથ બને હથીયાર
બાળકનો આધાર બને,ને માનવીનો સથવાર
કલમપકડી આંગળીએ,ત્યાં દઇદે એ અણસાર
પકડહાથની એવીભઇ,કદીક મૃત્યુએ લઇ જાય
                       ………મનમાં અડગ છે શ્રધ્ધા.
સ્નેહની સાંકળ ન્યારી,ઉજ્વળજીવન કરી જાય
બને હાથ હથોડો જ્યારે,વ્યર્થ જીવન થઇ જાય
હાથ કદી હથીયાર બને,ને આંગળી એ સંગાથ
પ્રેમથી પકડેલ આંગળી,જન્મ સાર્થક કરી જાય
                       ……….મનમાં અડગ છે શ્રધ્ધા.

====++++=====++++=====++++===

                         દર્શનની પ્યાસી

તાઃ૧/૧૦/૨૦૧૦                         પ્રદીપ બ્રહ્મભટ્ટ

પાવાગઢની ઓ માડી,તારા દર્શન કરવા હું આવી
શ્રધ્ધા ભક્તિની સંગે ,મા હું ગરબે ધુમવાને લાગી
તારા ગરબે દેતીતાળી,મા હું રુમઝુમ કરતી આવી
                            ………ઓ પાવાગઢની માડી.
માબહુચરમા ઓ કાળકામા,માચામુંડા ચોટીલાવાળી
ઓદુર્ગામા ઓમેલડીમા,મા વહાણવટી પાળજવાળી
મા તાલ દેતી ગરબે ઘુમતી,તને રાજી કરવા આવી
                         મા તને રાજી કરવા હું આવી
                              ………ઓ પાવાગઢની માડી.
તાલેતાલથી ગરબે ઘુમતી,મા હું સિંદુરને સાથે લાવી
દેજેપ્રેમ ને હેત ઓ માડી,તારી ભક્તિ પ્રેમથી કરનારી
નવરાત્રીના નોરતા વ્હાલા,માડી લેજે ભક્તિ સ્વીકારી
                         મા કૃપાથી લેજે જીવને ઉગારી
                                ………ઓ પાવાગઢની માડી.

+++++++++++++++++++++++++++++++

                     નવરાત્રીનો વેપારી

તાઃ૧/૧૦/૨૦૧૦                       પ્રદીપ બ્રહ્મભટ્ટ

આવો બહેનો દોડો જલ્દી,આવી છે આ નવરાત્રી
માનાગરબા પ્રેમેગાવા,શેરીઓ અમેતો શણગારી
                            ………..આવો બહેનો દોડો જલ્દી.
ચુંદડી હું વેચુ ચાર રૂપીયામાં,
                   ને ઓઢણી તો છે આઠ રૂપીયે;
રાહ ના જોતાં આવતી કાલની,
                બહેનો સમય જાય જલ્દી જલ્દી;
             અરે બહેનો સમય રોકાય ના કોઇથી.
                            ……….આવો બહેનો દોડો જલ્દી.
સૌભાગ્યના કંકણ પણ લાવ્યો,
                   ને સાથે કંકુ પણ કપાળ માટે;
સિંદુરથી મા સહવાસે આવે,
                 ને સંતાન સંગે ઉજ્વળ જીવન;
              મા મહેંકે મધુર અમારુ આ જીવન
                           ……….આવો બહેનો દોડો જલ્દી.
ઝાંઝર લાવ્યો જે ધુંધરૂ લાગે,
              છે દસ રૂપીયાની આ જોડી આજે;
નવરાત્રીની રમઝટ માંણવા, 
              લાવ્યો દાંડીયા તાલ દેવાને કાજે;
          ગરબે ઘુમજો બહેનો રાસ રમજો સાથે
                             ……….આવો બહેનો દોડો જલ્દી.
દીવાની દીવેટ હું લાવ્યો સાથે,
                    જે પ્રકટે છે કલાકની ઉપર;
ગરબે ઘુમતી બહેનોને આજે,
                પ્રસાદ પણ અંતે હું જ દેવાનો;
          કૃપાએ માની રાજી બહેનોને કરવાનો
                            ………..આવો બહેનો દોડો જલ્દી.

ૐૐૐૐૐૐૐૐૐૐૐૐૐૐૐૐૐૐૐૐૐૐ